Loaiybaai ihthiraamaai alhaalun…

 

ލޯތްބާއި އިހްތިރާމާއި އަޅާލުން … 

 

 

އާއިލާގެ ކުދިންނާއެކު ހޭދަކޮށްލަން ލިބުނު ވަގުތުކޮޅެއްގައި އަޅުގަޑު އަހާލީމެވެ. “އަންކަލްއަށް ދޭނެ އެއްޗެއް އެބައޮތްތަ؟” އެއީ ޗުއްޓީގައި ގޮސް ކޮއްކޮގޭގައި ހުރިއިރު، ކޮއްކޮމެންގެ ކުދިންނާއެކު ހޭދަކޮށްލަން ލިބުނު ވަގުތުކޮޅެއްގައި އަޅުގަޑު ކޮށްލި ތަޖުރިބާއެކެވެ. ކޮންމެ ކުއްޖެއްގެ ވެސް ފުރަތަމަ ޖަވާބަކީ “އަންކަލްއަށް ދޭނެއެއްޗެއް ނެތް” ކަމަށް ބުނުމެވެ. އަނެއްކާވެސް ސުވާލު ތަކުރާރު ކުރުމަށްފަހު، އަޅުގަޑު ބުނީމެވެ. “ކޮންމެ ކުއްޖަކަށްވެސް ދެވޭނެ އެއްޗެއް އެބައޮތް.”  

 

މިހެންބުނުމަށްފަހު، އަދި އެއްފަހަރު ފުންކޮށް ވިސްނާލާފައި އެހެން ޖަވާބެއް ދެވިދާނެތޯ ބަލަން ބުނީމެވެ. އިރުކޮޅަކުން “ޖަވާބު އެނގޭ” ކަމުގައި އެއްކުއްޖަކު ބުންޏެވެ. އެހެންނަމަވެސް، އޭނާ ޖަވާބުދޭކަށް ބޭނުމެއް ނުވިއެވެ. (މަދަރުސާގައި ކުދިން ކުރާ ތަޖުރިބާއަކީ، ނުބައިޖަވާބު ދެވިއްޖިއްޔާ މުދައްރިސްގެ ނުރުހުމާއި އެހެން ދަރިވަރުންގެ ކުރިމަތީގައި އަގުވެއްޓުން ކަމުގައި ވާތީ، ޖަވާބުދިނުމަށް ކުދިން ފަސްޖެހުން އެއީ އަޅުގަޑުމެންގެ ތެރޭގައި އާކަމެއް ނޫނެއްނޫންތޯއެވެ؟)  

 

ކޮންމެއަކަސް، ޖަވާބު އެނގޭކަމަށް ބުނި ކުއްޖާގެ ބަހުން ހިތްވަރު ލިބިގެން “ޖަވާބު އެނގޭ” ކަމަށް އަނެކަކު ބުނެފިއެވެ. ޖަވާބަކީ ކޮބައިތޯ އެހުމުން އޭނާގެ ޖަވާބަކަށްވީ “ރެސްޕެކްޓް” އެވެ. އެއީ ރަނގަޅު ޖަވާބެއް ކަމުގައި އަޅުގަޑު ބުނީމެވެ. އެތަޖުރިބާއިން ހިތްވަރު ލިބިގެން، ކުރިން ޖަވާބު އެނގޭކަމަށް ބުނި ކުއްޖާ، އޭނާއަށް ވުރެ ދޮށީ ދައްތަގެ ކަންފަތްބުޑުގައި ސިއްރުސިއްރުން އޭނާގެ ޖަވާބު ބުނެފިއެވެ. އޭނާގެ ޖަވާބަކީ “ހަގްސް” އެވެ. އެޖަވާބު ވެސް ރަނގަޅުކަމަށް ބުނުމުން ދެން ޖަވާބުތައް ލިބެން ފަށައިފިއެވެ. އަނެއް ޖަވާބަކަށް ލިބުނީ “ލަވް” އެވެ.

 

އަޅުގަޑުމެންގެ އާއިލާތަކުގެ މެމްބަރުންގެ މެދުގައި އެކަކު އަނެކަކަށް ބުރަޔެއް އުފުލުމަކާ ނުލާ ކޮންމެދުވަހަކު ބަހާނެ ހަދިޔާ އަޅުގަޑުމެން ކޮންމެ މީހެއްގެ އަތުގައި އެބަތިބިކަން ކުދިންނަށް ވިސްނި، އެވިސްނުމުގެ ތެރޭގައި ކުދިން ބޮޑެތި ކުރެވޭނަމަ، މިގައުމަކީ ހާދައުފާވެރި ތަނަކަށް ހެދޭނެއެވެ. އެއްވެސް މީހަކަށް އަނެކަކަށް ދެވޭނީ، އެމީހަކަށް ލިބިފައިވާ އެއްޗެއްކަމާއި، ތިމާ އެހެންމީހަކަށް ދިން އެއްޗެއް އެމީހާޔަށް އެހެން މީހުންނަށް ދެވޭނެކަން އެނގޭނަމައެވެ.

 

އަޅުގަޑުމެންގެ ތެރޭގައި މިއޮތް ފިތުނަފަސާދައާއި ދެކޮޅުވެރިކަމާއި އެއްބަޔަކު އަނެއްބަޔަކު ނެތިކޮށްލުމަށް ބޭނުންވާ ބޭނުންވުން ފަހަނައަޅާގޮސް، އުފާވެރިކަމާއި ފާގަތިކަމުގެ މުޖުތަމައެއް ބިނާކުރެވޭނީ ހިތްހެޔޮކަމާއި އަޅާލުމާއި އޯގާތެރިކަން މިގައުމުގައި އަށަގަންނުވާ އާންމުކޮށްގެންނެވެ. އެކަން ކުރެވޭނީ އަޅުގަޑުމެންގެ ކުދިންނަށް ނަމޫނާ ދައްކައިދީ އެކުދިންގެ ވިސްނުމާއިފިކުރު ބަދަލުކޮށްގެންނެވެ. މިއަދު އަޅުގަޑުމެންގެ ތެރެއިން މިފެންނަ ގޮތެއްފޮތެއްނެތް ނޭއްގާނީ ނަމޫނާދައްކާ ބޮޑެތިމީހުންގެ ވަކިތަކުން މިއަދުގެ ޖީލު ސަލާމަތް ކުރެވިގެންނެވެ.

 

Dhivehiraajjeygai kuda kudhinge haalathu…

 

ދިވެހިރާއްޖޭގައި ކުޑަކުދިންގެ ހާލަތު … 

 

މިއަދަކީ ހިތަށް ވަރަށް އުނދަގޫވި ދުވަހެކެވެ. އުމުރުން އެންމެ ހަތްއަހަރުގެ ކުޑަކުއްޖަކު ކުޅެން އުޅެނިކޮށް ވާގަނޑެއްގައި ކަރުދަންޖެހިގެން މަރުވި ޚަބަރަކީ، ދިވެހިރާއްޖޭގައި ކުޑަކުދިންނަށް ހުރި ނުރައްކާތައް އިތުރަށް ހަނދާންކޮށްދިން ހިތާމަވެރި ޚަބަރެކެވެ. އަޅާނުލެވުމާ ނުބެލެހެއްޓުމުގެ ސަބަބުން ކުދިން ގެނބިގެންނާއި އެނޫންގޮތްގޮތުން މަރުވުމާއި ގެއްލިފައިވާ އަދަދު މިފަހުންވެސް މަދެއް ނޫނެވެ. އެކަމަށްޓަކައި މުޖުތަމައު ހޭލުންތެރިކުރުވުމަށް އަދިވެސް އެކަށީގެންވާ މަސައްކަތްތަކެއް ކުރެވޭ ކަމުގައި ނުދެންނެވޭނެއެވެ. ރާއްޖޭގައި ބޮޑު ޚަރަދުކޮށްގެން ހިންގާ ސަރުކާރު މީޑިޔާއާއި އަމިއްލަ ތަންތަނުންވެސް މި ބޮޑު މައްސަލައަށް އެކަށީގެންވާ ސަމާލުކަމެއް ނުދެވެއެވެ.

 

މިދިޔަ ހަފުތާ ނިމިގެންދިޔައީ ވެސް މުޅިގައުމުގައި ދަރިންނަށް ހުރި ނުރައްކަލުގެ ރަނގަބީލު އަޅަމުންނެވެ. ހަފުތާއެއްގެ ތެރޭގައި މާލޭގެ ތިން ސަރަހައްދަކުން މަރާލާފައި އެއްލާލާފައި އޮތް ތުއްތުތުއްތު ތިންކުއްޖެއްގެ ވާހަކައެވެ. އެކަންކުރީ އެކުދިންގެ މައިންނެވެ. (ދުނިޔޭގެ ލަދުން ސަލާމަތް ވުމަށެވެ.) ހަމައެއާއިއެކު، އަމިއްލަ ދަރިންގެ އިއްފަތް ނަގާލި ތިން ބައްޕައިންގެ ވާހަކައެވެ. މިއީ ދިވެހިރާއްޖޭގައި ކުދިންނަށްހުރި ހާލެވެ. އެކަމަށް ފަރުވާކުރަން ކުރަންޖެހިފައިވާ ގައުމީ ބޮޑުމަސައްކަތާއިގެން މީހުން އުޅޭތަނެއް ނުފެނެއެވެ. ކަމާބެހޭ ފަރާތްތަކުން ކުރިކަމަކީ ނޫސްބަޔާން ނެރުމާއި މުޒާހަރާކުރުމެވެ. ވަރަށް އަވަހަށް ވެސް މުޒާހަރާއެއް އޮންނާނެކަމަށް ވެއެވެ. މިއީ ޒިންމާ ބޮލުން އެއްލާލުމަށް މިފަހަކަށް އައިސް މިތަންތަނުން ކުރާ “މާމޮޅު” ކަމެކެވެ.

 

ކުދިންނަށް ކުރާ ޖިންސީ އަނިޔާއާއި އިއްފަތްފޭރިގަތުން އިންތިހާއަށް ގޮސްފައިވާ އިރު، ހޯދިފައިވާ ކުރިއެރުންތަކެއް ވެސް އެބަހުއްޓެވެ. ގާނޫނީ އޮނިގަނޑު އެންމެ ފުރިހަމަނުވި ކަމުގައިވިޔަސް ވަނީ ހަރުދަނާ ކުރެވިފައެވެ. ތަހުގީގީ މަރުހަލާއާއި ޝަރީއަތުގެ މަރުހަލާގައި ކަމާބެހޭ އިދާރާތަކުގެ ގާބިލުކަން އިތުރުވެ، ކުރިއެރުންތަކެއް ހޯދިފައިވާތަން ވަނީ ފެންނަން ފަށާފައެވެ. މިދިޔަ ދެހަފުތާއެއްގެ ތެރޭގައި ކުދިންނަށް ޖިންސީ އަނިޔާކުރި ފަރާތްތަކެއްގެ މައްޗަށް ޝަރުއީ މަރުހަލާގައި ކުށް ސާބިތުވެ، ހުކުމް ކުރެވިފައިވެއެވެ.

 

ކުދިންނަށް ރައްކާތެރިކަމާއި ސަލާމަތްކަން ހޯދުމަށް ކުރަންޖެހިފައިވާ ބޮޑުމަސައްކަތުގައި އެންމެފުރިހަމަޔަށް ސާބިތުވެތިބުމުގެ ޝުކުރު ހައްގުވާ ފަރާތަކީ ދިވެހި ފުލުހުންނެވެ. އެހެންނަމަވެސް، ފުލުހުންގެ ގާބިލުކަންވެސް ވަނީ އިތުރުކުރަންޖެހިފައެވެ. އަދި ދައުލަތުގެ ވަކީލުންގެ ގާބިލުކަމާއި ޝަރުއީދާއިރާގެ ގާބިލުކަންވެސް އިތުރުކުރަން ވަނީ ޖެހިފައެވެ. މިކަންކަމަށް އެކަށީގެންވާ ސަމާލުކަމެއް ދެވޭކަމަށް ދެންނެވޭކަށް އަދި ނެތެވެ. 

 

މައިންބަފައިންގެ ރަހުމުކުޑަ އަތްތަކުން ދުއްވާލެވޭ ތުއްތުކުދިންގެ ފުރާނަޔާއި، ބައްޕައިންގެ އަނިޔާވެރި ވަކިތަކުގެ ޖިންސީ ޝިކާރަޔަކަށް ވެފައިވާ ކުދިންގެ ސަލާމަތާއި ރައްކާތެރިކަމަށް، ދައުލަތުން މިހާރަށް ވުރެ ބޮޑު އިސްކަމެއް ދޭނެނަމައެވެ. ކުދިންނަށް ރައްކާތެރި ހަޔާތެއް ހޯދާދިނުމުގައެވެ. މުޖުތަމިއުގެ ފަރާތުންނާއި އާއިލާގެ ފަރާތުންވެސް މެއެވެ. ދަރިން މެރުމާއި ޖިންސީ އެދުންފުއްދުމަށް ބޭނުންކުރުމުގެ އިތުރުން ދަރިން ވިއްކުންވެސް ދިވެހިރާއްޖޭގައި އިންތިހާއަށް އެބައޮތެވެ.

 

މީޑިޔާގައި ރިޕޯޓުކޮށްފައި ނެތްކަމުގައި ވިޔަސް، މިހާރުވެސް ތަހުގީގީ/ޝަރުއީ މަރުހަލާ ގައި ދަރިން ވިއްކުމުގެ މައްސަލަތައް އެބަހުއްޓެވެ. މީގެތެރެއިން އެއް މައްސަލަޔަކީ، އުމުރުން ބާރަ އަހަރުގެ އަންހެން ދަރިފުޅު، ރަށުގެ މީހުންނަށް ވިއްކި މައްސަލައެވެ. އެކުއްޖާ ސްކޫލުން ނިމިގެން ގެޔަށް އަންނައިރު، ގޭދޮށުގައި ކިޔޫއަށް ފިރިހެނުން ތިބެއެވެ. ދަރިފުޅު ވިއްކައިގެން އާމްދަނީ ހޯދަނީ މަންމައެވެ. އާއިލާގެ ޚަރަދުބަރަދު ހަމަޖެއްސުމަށެވެ. އެއްދުވަހު އެކަނިވެސް އެދަރިފުޅަށް ދިހަމީހުންނަށް “ޚިދުމަތް” ދޭން ޖެހުނުކަމަށް ވެއެވެ. އެހެންކަމުން، އޭނާޔަށް ގިނަދުވަހު ސްކޫލަށް ނުދެވެއެވެ.

 

މިއީ ދިވެހިކުދިންގެ ހާލެވެ. ބޮޑެތިމީހުންގެ ސުވަރުގެ މިވަނީ އެކުދިންނަށް ދުނިޔެމަތީގައި ނަރަކައެއް ކަހަލަ ތަނަކަށެވެ.

 

ގުޅުންހުރި ޕޯސްޓް: ރިޔާސީބަޔާނާއި ކުދިންނަށްކުރާ އަނިޔާ ހުއްޓުވުން

 

Kudhinge umurufuraa kanda elhumaa, kudhinnah kuraa aniyaa-aa, dhivehinnaa, March mas…!!!

 

 

 

ކުދިންގެ އުމުފުރާ ކަނޑައެޅުމާ، ކުދިންނަށް ކުރާ އަނިޔާއާ، ދިވެހިންނާ، މާރިޗުމަސް…!!!

 

ޖިސްމާނީގޮތުންނާއި ނަފްސާނީގޮތުން އަދި ޖިންސީގޮތުން ކުދިންނަށް ކުރާ އަނިޔާއާއި ބެހޭގޮތުން ދިވެހިރާއްޖޭގައި އެންމެ ފުޅާދާއިރާއެއްގައި ހެދި ރިޕޯޓު ޝާއިއުކުރި ޚަބަރު މީޑިޔާއިން ގެނެސްދިނީ މީގެ ދެއަހަރު ކުރިން، 2009 ވަނަ އަހަރުގެ މާޗުމަހުގެ ކުރީކޮޅުގައެވެ. ޔުނިސެފުން ޝާއިއުކުރި މިރިޕޯޓުގައިވާ، އެންމެން ސިއްސުވާލި ޚަބަރަކީ، މިރާއްޖޭގެ ކޮންމެ 5 އަންހެންކުދިންގެ ތެރެއިން އެއްކުއްޖަކީ ޖިންސީގޯނާ ތަޖުރިބާކޮށްފައިވާ ކުއްޖެއްކަމުގެ ވާހަކައެވެ.

 

ދިވެހިސަރުކާރުގެ އޭރުގެ ޖެންޑަރ އެންޑް ފެމިލީ ޕްރޮޓެކްޝަން ޔުނިޓާއި ޔުނިސެފް އަދި މިފަދަދިރާސާތައް ކުރާ ބައިނަލްއަގްވާމީ ކޮންސަލްޓަންޓުންކަމުގައިވާ ޓޭލަރ ނެލްސަން ސޮފްޓްވެއަރ (ޓީއެންއެސް) އިން ގުޅިގެން ކުރި މިދިރާސާއިން އެނގުނުގޮތުގައި އިންޓަރވިއު ކުރެވުނު ފިރިހެންކުދިންގެ ތެރެއިން 11 އިންސައްތަ ފިރިހެންކުދިންނަށްވެސް ޖިންސީގޯނާ އާއި ކުރިމަތިލާން ޖެހިފައިވެއެވެ.

 

މިދިރާސާގެ ޖުމްލަ ނަތީޖާއާއި ބެހޭގޮތުން ވާހަކަދައްކަމުން ޓީއެންއެސް ގެ އިންގަލްހާޓް ބުނެފައިވެއެވެ. “ގެއަކީ ރައްކާތެރިތަނެއް ނޫނެވެ. މުޖުތަމިއުއަކީ ރައްކާތެރިތަނެއް ނޫނެވެ. މަދަރުސާގައި ކަންއޮތްގޮތް ސާފެއްނޫނެވެ.” އަދި އޭނާ ފާހަގަކުރިގޮތުގައި މިތަފާސްހިސާބު ތަކަކީ ބައިނަލް އަގްވާމީ މިންގަޑުތަކުން ބަލާއިރު، ކަންބޮޑުވާންޖެހޭ އަދަދުތަކެކެވެ.

 

ދިވެހިރާއްޖޭގެ ޕޮލިސް އިންޓެގްރިޓީ ކޮމިޝަން ގެ މެމްބަރަކަށް މިވަގުތު ހުންނެވި ޑރ. ޢަބްދުﷲ ވަހީދު، އޭނާގެ އަމިއްލަ ބްލޮގުގައި އޭރު ލިޔުއްވި ލިޔުއްވުމެއްގައި ކުރައްވާފައިވާ އެއް ދައުވާއަކީ، 1991 ވަނަ އަހަރު ކުޑަކުދިންގެ ހައްގުތަކާއިބެހޭ ގާނޫނެއް ފާސްކުރިފަހުން، 18 އަހަރުންދަށުގެ ކުދިން ކުށަށް އަރައިގަތުން އިންތިހާއަށް އިތުރުވިކަމުގައެވެ. އަދި މިއީ އިއްތިފާގެއް ނޫންކަމަށް ގަބޫލު ކުރެވޭ ސަބަބުތައް އެބަހުރިކަމަށާއި ކުދިން ކުށްކުރުމުގެ ޒިންމާގެ ބައެއް އުފުލަންޖެހެނީ މިގާނޫނުކަމަށް ވެސް އޭނާ ދައުވާކުރައްވާފައިވެއެވެ. އެއީ ވެސް މާޗުމަހެވެ.

 

އޭރުގެ ރައްޔިތުންގެ މަޖިލީހުގެ މެމްބަރު އިބްރާހިމް އިސްމާއީލް، ކުޑަކުދިންނަށް ކުރާ ޖިންސީ އަނިޔާއަކީ ޖިނާއީކުށެއްކަމުގައި ބަޔާންކޮށް ހުށަހެޅި ބިލު ވެސް ހުށަހެޅިގެންދިޔައީ 2009 މާޗުމަހުގެ ތެރޭގައެވެ. އެމަހަކީ ރ. އިންނަމާދޫއަށް އުފަން، އުމުރުން ހައަހަރުގެ ކުއްޖަކު ތަކުރާރުކޮށް އެތައްފަހަރަކު ރޭޕްކޮށް އެކަމުގެ އަނިޔާގައި ލޯއަނދިރިވެ އެއްފަޅިވާގިނެތިގެން ސިލޯނުގެ އެޕޯލޯ ހޮސްޕިޓަލުގައި ފަރުވާދިނުމަށް ގެންދިޔަމަހެވެ. އެމައްސަލައިގެ ތުހުމަތުގައި ފުލުހުން މީހަކު ހައްޔަރުކުރިއެވެ.

 

އިބްރާ ގެ ބިލު ހުށަހަޅަމުން އޭނާ ބުނިގޮތުގައި އެބިލުގެ ބޭނުމަކީ އެމަހު ހައްޔަރުކުރި މީހަކު ފިރިހެންކުދިންތަކަކަށް ކޮށްފައިވާ ޖިންސީގޯނާ ތަކުރާރުވިޔަ ނުދިނުމެވެ. އެނޫން ދެމީހަކުވެސް މާލެއިން ހަމަ، އެދުވަސްކޮޅުގެ ތެރޭގައި، ގިނައަދަދެއްގެ ފިރިހެންކުދިންނަށް ޖިންސީގޯނާކުރުމުގެ ތުހުމަތުގައި ފުލުހުން ހައްޔަރުކުރިއެވެ. މީގެ ތެރެއިން އެކަކީ 2002 ވަނަ އަހަރާއި 2004 ވަނަ އަހަރު، 13 އަދި 17 އަހަރުގެ ފިރިހެން ކުދިންނަށް ޖިންސީގޯނާކުރުމުގެ ތުހުމަތުގައި ހައްޔަރުކޮށް، 2006 ވަނަ އަހަރު 13 އަހަރުގެ ފިރިހެންކުއްޖަކާއެކު ޖިންސީގުޅުން ހިންގި މައްސަލައެއް ސާބިތުވެގެން ތިންއަހަރުގެ ހުކުމެއްކޮށް އެހުކުމް ތަންފީޒުކުރަން އަރުވާލާފައިހުއްޓާ، އެރަށުގައި ފިރިހެންކުއްޖަކަށް ޖިންސީގޯނާކުރިމައްސަލައެއްގައި 2007 ވަނަ އަހަރު ހައްޔަރުކޮށްފައި ހުރި މީހެކެވެ.

 

ގެމަނަފުށީގައި ތިންފިރިހެނަކު ވެގެން، 17 އަހަރުގެ އަންހެންކުއްޖަކު ގޭންގްރޭޕްކޮށްލީ އިބްރާ އެ ބިލު ހުށަހެޅުމުގެ ދެ ހަފްތާކުރިން ހަމަ މާޗުމަހެއްގައެވެ. އެމައްސަލަ ބެލުމަށްވެސް ދިވެހި ފުލުހުން ތިންމީހަކު ހައްޔަރުކުރިއެވެ. ޑރ. އަބްދުﷲ ވަހީދުގެ ލިޔުއްވުން އޭނާގެ އަމިއްލަ ބްލޮގުގައި ލިޔުއްވާފައިވަނީ އެ ގޭންގްރޭޕް ހާދިސާގެ ތިންދުވަސް ފަހުންނެވެ.

 

ޑރ. ޢަބްދުﷲ ވަޙީދުގެ ލިޔުއްވުމަށް ދެއަހަރު އަދި މާލޭގެ މަގުމަތީގައި، ނުބައި ވަގުތަކު ނުބައިތަނެއްގައި ހުރެވުނު، ކަމާނުބެހޭ 10 އަހަރުގެ ކުއްޖަކަށް ތޫނު އެއްޗަކުން ހަމަލާދީ ހޮސްޕިޓަލަށް ގެންދިޔަތާ ތިން އަހަރުފުރުނު މި ހިނގާ މާޗުމަހު، ދިވެހިރާއްޖޭގެ ރައްޔިތުންގެ މަޖިލިހަށް އެމަޖިލީހުގެ އިއްޒަތްތެރި މެންބަރަކު މިވަނީ، ކުޑަކުދިންގެ ހައްގު ލިބެންޖެހޭނީ 16 އަހަރާ ހަމަޔަށް ކަމުގައި ހަމަޖެއްސުމަށް ބިލެއް ހުށަހަޅާފައެވެ. އޭނާ ސިފަކުރައްވާގޮތުގައި “ބޮޑެތި ކުށްތަކުގައި ގިނައަދަދަކަށް މިތިބެނީ 18 އަހަރު ނުފުރޭކުދިން” ނެވެ. އެހެންކަމުން އޭނާގެ އެ އިސްލާހުގެ މަގުސަދަކީ “ކުދިން ބޮޑަތި ކުށްތައް ކުރުމާއި ކުށްތަކުގައި ބައިވެރިކުރުން ހުއްޓުވުން” ކަމުގައި ސަން ނޫހުގައި ލިޔެފައިވެއެވެ.

 

އަޅުގަޑުގެ ތަޖުރިބާގައި، ޑރ. ވަހީދާއި އިއްޒަތްތެރި މެންބަރު މަހްލޫފު ފަދައިން، އުމުރުން 18 އަހަރު ފުރުމާހަމަޔަށް ކުދިންނަށް ލިބޭ ހައްގުތައް އެކުދިންނަށް އޮތުމަކީ މުޖުތަމިއުގެ ކަންކަން ގޯސްވުމުގެ ސަބަބެއްކަމުގައި ގަބޫލުކުރާ ދިވެހިން މަދެއް ނޫނެވެ.

 

އެހެންނަމަވެސް، އުމުރުން 16 އަހަރުފުރިގެން ބޮޑުވެފައިވާ މީހަކަށް ދުއްވުމުގެ ލައިސަންސް ދިނުމާއި ވޯޓުދިނުމުގެ ހައްގު ދިނުމާއި މަޖިލީހުގެ މެމްބަރުކަން ދިނުމުގެ ވާހަކަދައްކައިފިއްޔާ އެމީހުން ބުނާނީ އެކުދިން އަދި ތަސައްރަފު ނުފުދޭނެކަމުގައިކަމަށް ވަރަށް ބޮޑަށް ހީވެއެވެ. މިމީސްމީހުންނަށް އަޅުގަޑު ހަމައެކަނި ބުނެލަން އޮތީ ކުދިންނަށް ކުރާ އަނިޔާ ހުއްޓުވުމަށް ނަސޭހަތްދީ މިދިޔަ ނޮވެމްބަރު މަހު ދީފައިވާ ޚުޠުބާ ކިޔާލުމަށެވެ.

 

ގުޅުންހުރި ލިޔުން: ސަން އިން ، ޢަބްދުﷲވަޙީދު ގެ ބްލޮގުން